Die vlagskip van Audi se Q-reeks is pas in Suid-Afrika bekendgestel.

Die Audi Q8 is ‘n vermenging van die sportiewe stilerings-eienskappe van ‘n koepee en die veelsydigheid van ‘n sportnuts voertuig, en die ruim binnekant met ‘n aanpasbare bagasieruim, gevordere veerstelsel en  vindingryke bestuurs-hulpmiddels maak die Q8 uiters geskik vir werk en ontspanning.

Die Q8 is korter, breër en laer as die Q7, en hoewel dit ‘n sportnuts-koepee is, maak die asafstand van byna drie meter dat hy ruimer as enige van sy regstreekse mededingers is. Daar is drie afsonderlike sitplekke wat vorentoe en agtertoe geskuif kan word soos dit nodig is, en wanneer die sitplekke platgevou word, is die kapasiteit van die bagasieruim 1 755 liter.

Die Q8 is die volgende stap in die ontwerp-rigting wat Audi met die nuwe A8 begin inslaan het, en wat mettertyd op die hele reeks te sien sal wees. Die opvallende nuwe sierrooster staan regop en beskik oor ‘n agthoekige ontwerp; ‘n wye masker, wat in ‘n kontrasterende kleur bestel kan word, verbind die hoëdefinisie- LED Matrix-kopligte wat ook oor dagryligte beskik. Die kant van die motor het ‘n koepee-agtioge voorkoms, met ‘n skuins agterkant. Aan die agterkant is daar ‘n strook wat oor die agterklap strek en die LED-agterligte met mekaar verbind.  Hierdie strook, wat in swart afgewerk is, en ‘n geïntegreerde ligstrook bevat, beklemtoon die Q8 se breedte en is ‘n kenmerk van al Audi se topmodelle. Die Q8 is beskikbaar in twaalfkeure, waaronder tien metaalkleure. Een daarvan is Dragon Orange, wat eksklusief vir die Q8 beskikbaar is.

Met sy grondvryhoogte van 254 mm, kort oorhange, afdraandebeheer en Audi se bekende quattro-vierwiel aandrywing-stelsel kan die Q8 byuna enige terrein baasraak. Die aanpas-baere lugvering wat standaard toerusting is, het gemak- en sport-verstellings en die ryhoogte is verstelbaar volgens behoefte.

Daar is tans net een model beskikbaar, naamlik die Q8 55 T FSI quattro; die 45 TDI sal later by die reeks gevoeg word. Die 55 T FSI se turbo-aangejaagde V6-enjin van drie liter lewer 250 kW teen 5 000 opm en wringkrag van 500 Nm teen tussen 1 370 en 4 500 opm. Die Q8 kan binne  5,9 sekondes van 0 tot 100 km versnel en sy top-snelheid is elektronies beperk tot 250 km/h. Die kragbron is selfs meer doeltreffend as gevolg van die gebruik van ligte hibriede-tegnologie. Wanneer daar gerem word, kan 12 kW na die battery gevoer word; dit maak ook dat daar lank gery kan word deur die enjin te deaktiveer, asook ‘n stop-en-aansit stelsel wat by 22 km/h begin werk. Dit verminder brandstof verbruik met tot 0,7 liter per 100 km.

Die binneruim van die Q8 is uiters luuks afgewerk. Die maklik verstaanbare simbole weerspieël Audi se digitale presisie.  Die sentrale fokuspunt is die MMI-raakskerm wat byna in ‘n swart oppervlak saamsmelt wanneer dit afgeskakel is. Alles in die binnekant vorm ‘n logiese eenheid, van die strookm wat die luguitlate bevat, tot die wye konsole waarin die Tiptronic-ratkieser gemonteer is.

Die sitplekke het leer-bekleedsel as standaard toerusting, met leer, ‘n kombinasie van leer en Alcantara en Valcona-leer wat opsioneel beskikbaar is; kopers kan kies tussen bruin, swart, grys oif beige afwerking. Diegene wat die S-Line- sport pakket kies, kry sport-sitplekke in Valcona-leer met die S-embleem in die rugleunings van die voor-sitplekke geborduur.  Die Q8 het viersone-klimaat beheer met aparte kontroles vir die agterste insittendes as standaard toerusting. Die motor se binneruim en agterklap kan oop- of toegesluit word sonder óm ‘n sleutel te gebruik; dit moet net naby wees.

Daar is twee MMI-raakskerms; die boonste een van 10,1 duim word gebruik om die navigasie- en inligting-en-vermaak stelsel te beheer en die onderste een van 8,6 duim is vir die klimaat beheer. Die motor reageer op stem-opdragte en as ‘n mens byvoorbeeld sê: “ek is honger”, kan die navigasie-stelsel die naaste restaurant opspoor.  Die Q8 het Audi se Virtual Cockpit, wat aan die stuurkajuit van ‘n vliegtuig herinner, in die plek van ‘n gewone instrumente-paneel as standard toerusting. Daar is ook ‘n vertoon paneel op die voorruit wat belangrike inligting, soos die aanwysings van die navigasie-stelsel, gee. Om ‘n slimfoon aan die motor se lugdraad te koppel, is baie maklik en data kan maklik oorgedra word . Diegene wat iPhones besit, sal mettertyd hul slimfone koordloos kan laai, terwyl Apple Car Play en Android Auto-versoening standaard toerusting is.  Die gevorderde Bang & Olufsen-klankstelsel beskik oor 23 luidsprekers.

Die Q8 beskik oor verskeie hulpmiddels wat die lewe soveel makliker vir die bestuurder maak. Daar is ‘n stelsel wat dit vir die bestuurder makliker maak om in die nag te sien; dit gebruik ‘n infrarooi kamera om voetgangers en groot wilde diere te bespeur; dit word met ‘n geel raam in die Virtual Cockpit aangedui. Verder is aanpasbare spoedbeheer, aktiewe baanhulp en ‘n voorbotsing-sensor standaard toerusting. Die baanhulp bespeur strepe op die pad, pad-oppervlaktes, voertuie in aangrense bane, asook voertuie wat verder vorentoe ry. Die aanpasbare spoed-beheer stelsel beheer die versnelling en remming van die motor na aanleiding van inlgting wat deur die motor se senors gegee word, data van die navigasiestelsel en verkeerstoestande. Dit pas ook aan by heersende snelheidsperke, en verminder spoed voor draaie en verkeersirkels. Dit pas ook aan by die gekose bestuurs program en ondersteun die voordele van die ligte hibriedestelsel. Die noodbystand stelsel verseker veiligheid in uitsonderlike omstandighede en kan binne die beperkinge van die stelsel bespeur wanneer die bestuurder onaktief is of nie op die pad konsentreer nie. Dit waarsku die bestuurder met visuele en hoorbare tekens asook kort aktivering van die remme om op te tree en wanneer die bestuurder nie reageer nie, neem die stelsel beheer en bring die voertuig tot stilstand.

Benewens die standaard model is daar ook drie S-Line-pakkette beskikbaar, naamlik S-Line Black, S-Line Platium en S-Line Sports. Die S-Line Black-pakket bestaan uit hoëglans swart afwerking, swart buitespieëls, swart dakrelings, 22 duim allooiwiele en rooi remknypers. Die Paltinum het die S-Line-buiteafwerking, ‘n grys masker wat die kopligte verbind, aanpasbare lugvering, 22 duim allooiwiele en rooi remknypers. Die S-Line Sports-pakket beskik oor ‘n aantal bykomende kenmerke aan die binnekant, soos vierledige lendesteun verstelling vir die voorsitplekke, dekoratiewe panele in geborselde aluminium met matafwerking en  skermplate in die deure met die S-embleem.

Die prys van die Saudi Q8 55 T FSI quattro Tiptronic, wat Audi se Freeway-onderhoudsplan wat vir vyf jaar of 100  000 km geldig is, is R1 388 000.

%d bloggers like this: