Futuroad  van 18 tot 21 September by NASREC

0 Comments

Deur Daantjie Badenhorst.

Die twee-jaarlikse vragmotorskou, Futuroad, gaan van 18 tot 21 September by die NASREC-uitstallingsperseel, Suid van Johannesburg,  gehou word.

Die mark vir middelslag-, swaar en ekstra swaar vragmotors het in die eerste vier maande van 2019 positiewe groei getoon.

Dit is ‘n goeie teken, veral met die naderende Futuroad-uitstalling wat vir nou die tweede keer by NASREC gehou word. Die vorige Futuroad was in 2017.

In teenstelling met die mark vir passasiersmotors wat gekrimp het en die vir ligte handelsvoertuie wat min groei getoon het, was daar ‘n toename in verkope van 14,7% vir middelslagvragmotors en 6,9 en 1,6% vir swaar en ekstra swaar vragmotors onderskeidelik.

Joshua Low.

Volgens mnr. Joshua Low, die besturende direkteur van Messe Frankfurt Suid-Afrika, wat die Futoroad aanbied, beteken dit dat naderende Futuroad die ideale platvorm vir vervaardigers gaan wees om hul produkte aan besoekers vanuit Afrika Suid van die Sahara, ten toon te stel.

Aangesien uitstallers besef dat besoekers aan die vervaardigers se produkte blootgestel wil word, sal daar ook geleentheid wees vir besoekers om toetsritte te onderneem. Die RFA (Road Freight Association) en SABOA (South African Bus Operators Association) sal ook konferensies tydens die uitstalling aanbied.

Volvo en sy Japanese filiaal UD Trucks, wat pas die Kuzer en Quester in onderskeidelik die middelslag- en ekstra swaar marksegmente bekendgestel het, het reeds bevestig dat hulle by die uitstalling sal wees. Onder die ander vervaardigers wat ook hul deelname bevestig het, is FAW, Tata, Daewoo, Powerstar, JMC en Fiat Professional.

Messe Frankfurt is een van die grootste organiseerders van handelsuitstallings en besef hoe belangrik vragmotors en busse in die internasionale vervoerbedryf is. Daarom word Futuroad as ‘n alleenstaande uitstalling aangebied, tesame met ‘n uitstalling van onderdele, dienste en bykomstighede vir vragmotors en busse.

Besoek die volgende webwerf vir meer inligting: www.za.messefrankfurt.com

Categories:

Laat 'n boodskap

Jou e-posadres sal nie gepubliseer word nie.

%d bloggers like this: