Kia wys sy groot veldryer vir die VSA
Die eerste Kia wat in die Verenigde State van Amerika spesiaal vir die Amerikaanse koperspubliek ontwikkel is, is pas bekendgestel.
Die Telluride is ‘n groot sportnuts-voertuig met plek vir agt insittendes. Daar is ‘n 4×2-model beskikbaar, asook ‘n 4×4-model, met ‘n aandryf stelsel wat by veranderende toestande aanpas en wat na vierwiel-aandrywing oorgeskakel kan word wanneer die toestande dit vereis. Omdat die Telluride ‘n produk van Kia se ontwerpsentrum in Irvine in Kalifornië is, was die gedagte dat dit dieselfde stilerings kenmerke as ander legendariese sportnuts-voertuie moes bevat; gevolglik is hy groot, hoekig en opvallend, en dit lyk sommer asof hy enige terrein sal kan baasraak. Die gesofistikeerde stilering dui ook op ‘n uiters weelderige binneruim. Aan die voorkant is daar ‘n lang, breë enjinkap en ‘n breë sierrooster, gestapelde kopligte wat dadelik aandag trek en ‘n regop voorruit. Die agterligte het ‘n omgekeerde L-vorm en bevat LED- stroke terwyl daar twee groot uitlaatpype is.
Onder die enjinkap is daar ‘n 3,8 liter V6-enjin wat aan ‘n outomatiese ratkas met agt gange gekoppel word; hierdie enjin lewer 217 kW teen 6 000 opm en wringkrag van 355 Nm teen 5 200 opm. Die veerstelsel verstel vanself en die voertuig se ryhoogte word outomaties aangepas na aanleiding van die vrag wat gedra word om optimale beheer en standvastigheid te verseker. Daar is vier bestuurs-modusse om van te kies, naamlik Smart, Eco, Sport en Comfort, maar vir spesifieke toestande kan nog twee, naamlik Snow en AWD Lock gekies word. Onder normale omstandighede word krag 100% na die voorwiele versprei; veral in Smart- of Eco-modus. Met Comfort en Snow word die krag in ‘n verhouding van 80% na die voorwiele en 20% na die agterwiele versprei terwyl die verhouding in Sport-modus 65:35 is. In AWD Lock-modus word krag eweredig na al vier wiele versprei.
Toe die ontwerpers die Telluride se binneruim beplan het, was hul doelwit om materiale van hoogstaande gehalte te gebruik en baie aandag aan detail te gee. Die afwerking is in Nappa-leer met insetsels van hout en metaal, en daar is verhitte en geventileerde sitplekke vir die voorste en middelste rye sitplekke. Daar is ook aparte kontroles vir die klimaatbeheer vir die tweede ry insittendes en ‘n derde ry sitplekke wat kan teruglê. Die leer oor-getrekte stuurwiel kan verhit word. Die Telluride spog met ‘n baie lang lys standaard kenmerke, waaronder Kia se Drive Wise, bestuurshulpstelsel. Dit bestaan onder meer uit ‘n raakskerm van 10, 25 duim wat die uitleespaneel van die trukamera bevat, ‘n Harman/Kardon-klankstelsel met tien luidsprekers, versoenbaarheid met Apple Car Play en Android Auto, ses USB-kragpunte, ‘n koordlose selfoonlaaier, mini-Bluetooth- koordlose verbinding, asook sewe lugsakke.
Onder die Telluride se veiligheidskenmerke is stabiliteitsbeheer, afdraandehulp, ‘n stelsel wat botsings verhoed en die bestuurder waarsku as daar voetgangers of ander hindernisse in die pad is, ‘n blindekol-monitor, waarskuwings as die bestuurder op die oop pad per abuis van baan verwissel of nie oplet wat op die pad gebeur nie, ‘n stelsel wat die bestuurder waarsku as daar iets of iemand agter die voertuig verby beweeg en ‘n uitleespaneel tussen die instrumentepaneel en die voorruit. Daarby word die Telluride toegerus met ‘n UVO- telematikastelsel wat die bestuurder in staat stel om sekere funksies te monitor en te beheer. Die motor kan deur middel van afstandbeheer oop- of toegesluit en aangesit word en die temperature vir die klimaatbeheerstelsel kan ook met behulp daarvan verstel word. Die stelsel bevat ook sensors wat die bestuurder in kennis stel of daar insittendes agter in die voertuig is en wanneer hulle uitgeklim het. Die voertuig waarsku die bestuurder op een van ‘n paar maniere wanneer dit gebeur, onder meer deur middel van ‘n kennisgewing op die paneelbord, ‘n alarm en ‘n teksboodskap op die bestuurder se slimfoon indien dit aan die UVO-stelsel gekoppel is.
Die Telluride sal vervaardig word in West Point in Georgia, waar sommige Sorento- en Optima- modelle aan kopers afgelewer word. Wanneer hy later vanjaar in die VSA te koop is, sal vier spesifikasie vlakke, naamlik LX, EX, S en SX) beskikbaar wees, asook ‘n keuse tussen voor- en vierwiel-aandrywing.
