Mahindra het sy ikoniese veldryer, die Thar, nog meer avontuurlustig as ooit tevore gemaak met die toevoeging van die Adventure Series, wat oor ‘n paar ekstra bykomstighede beskik.

Die Adventure Series is gebaseer op die Mahindra Thar, maar het die volgende kenmerke by: spesiale allooi-wiele, stampers wat vir veldry toestande ontwerp is, ‘n snorkel en ‘n staalkappie.

Die belangrikste bykomstigheid is die nuwe voorstamper, wat van Bundu Gear afkomstig is. Nie net loop die kante van die stamper skuins na bo om die reeds indrukwekkende invalshoek van 44 grade verder te verbeter nie, maar die sleephakke is helderkleurig en daar is hegpunte vir ‘n domkrag en ‘n bosbreker wat die sierrooster beskerm. Benewens die LED-ligte is daar ook plek vir ‘n voorste trekstang en ‘n elektriese wenas. Die agterste stamper beskik oor ‘n ingeboude trekstang en helderkleurige sleephakke asook hegpunte vir ‘n domkrag.

Benewens die normale seildak is ‘n staal kappie wat deur Getec verskaf word, en waarvan die voorste en agterste dele vir ‘n oopdak-bestuurs ervaring verwyder kan word, standaard toerusting. Daarby is ‘n snorkel met ‘n luguitlaat bokant die dak standaard toerusting vir diegene wat deur water wil bestuur. Laastens is A-Line-allooiwiele standaard toerusting terwyl bande wat meer geskik vir veldrytoestande soos Hankook Dynapro AT’s, wat beter vastrapvermoë in modder en sand bied, teen ekstra koste bestel kan word.

Die oorspronklike weergawe van die Thar was op die Willys Jeep van die Tweede Wêreldoorlog, wat die maatskappy onder lisensie vervaardig het, gebaseer. Die huidige model is baie meer modern, en word toegerus met ‘n turbo diesel-enjin van 2,5 liter wat 78 kW teen 3 800 opm en ‘n wrinkrag van 247 Nm met ‘n plat wring kragkurwe van tussen 1 200 en 2 000 opm lewer. Die Thar word toegerus met ‘n vyfgang-handratkas en ‘n lae-strekratkas.

Onder die bakwerk is ‘n leer-raam onderstel met bladvere, ‘n stabiliseerstaaf en hidrouliese skokbrekers. Dit gee die Thar ‘n grondvyhoogte van 200mm. In Suid-Afrika is ‘n meganiese agterste ewenaarslot en wielnawe wat outomaties sluit, standaard toerusting. Die vierwiel aandrywing-stelsel is in samewerking met Borg Warner en laestrek kan deur middel van ‘n skakelaar gekies word. Daar is hoë- en laestrekopsies in wierwiel aandrywing. Hoewel die Thar bedoel is vir veldrytoestande is kenmerke soos twee bekerhouers, lugversorging, kragstuur en ‘n 12 volt-kragpunt standaard toerusting.

Daar is drie kleure vir die Thar beskikbaar, naamlik Rocky Beige, Red Rage en DSAT Silver. Die prys van die Adventure Series, wat ‘n waarborg van twee jaar of 50 000 km insluit, is R293 999, terwyl ‘n diensplan van drie jaar of 60 000 km teen ‘n verdere R19 999 beskikbaar is.

%d bloggers like this: