Opel is gevestig in Suid-Afrika

Alhoewel General Motors, wat Opel-voertuie voorheen in Suid-Afrika bemark en versprei het, hul werksaamhede in Suid-Afrika gestaak het, is Opel egter steeds aktief in Suid-Afrika. Na meer as 80 jaar is Suid-Afrika is Opel een van die oudste voertuig-handelsmerke in die land. In 2017 het die SA Gilde vir Motorjoernaliste (SAGMJ) die Opel Astra as die Suid-Afrikaanse Motor van die Jaar gekroon. Opel het ook al voorheen hierdie titel verower. In 1991 vir die Opel Monza. In 1994 vir die Opel Kadett en in 1995 vir die Opel Astra.

Opel en Vauxhall, die twee Europese onderafdelings van General Motors, is intussen deur Peugeot gekoop en nuwe Opel-modelle sal voortaan onderstelle met hul Franse stalmaats deel. Daar is tans 37 Opel-handelaars landwyd wat na huidige Opel-eienaars omsien en nuwe Opels bemark.

Behalwe gevestigde modelle soos die Adam, die Astra en die Corsa, het Opel ook drie sportnutsvoertuie by hul reeks in Suid-Afrika gevoeg. Die Mokka is al geruime tyd lank op die mark maar omtrent twee jaar gelede het hy ‘n aantal veranderinge ondergaan en die Mokka X-naam gekry.

Twee nuwe SNV-modelle aan weerskante van die Mokka X is ook in Suid-Afrika bekendgestel, naamlik die nuwe intreevlak-sportnutsvoertuig, die Crossland X en die nuwe Opel-vlagskip in Suid-Afrika, die Grandland X.

Opel se Crossland-X

Die Opel Grandland-X is Opel se topmodel in sy reeks.

Die nuwe Opels word deur ‘n waarborg van vyf jaar of 120 000 km en deur ‘n diensplan van vyf jaar of 90 000 km gerugsteun, terwyl ‘n onderhoudsplan teen ekstra koste beskikbaar is.