Sedert die 1960’s was die segment vir intreevlak-bakkies wat hoofsaaklik op klein motors gebaseer was, een van die gewildste op die Suid-Afrikaanse mark, maar met die uitsondering van die Nissan NP 200 is nie een van hulle meer beskikbaar nie.

Dit beteken egter nie dat klein bakkies heetlemal van die mark verdwyn het nie, want ‘n aantal vervaardigers het vorendag gekom met modelle wat die publiek se persepsies heeltemal verander het. Een van die eerste Chinese vervaardigers wat tot die Suid-Afrikaanse mark toegetree het, was Chana, wie se Benni deur ‘n vooraanstaande motortydskrif as uiters swak bestempel is, maar wat groot sukses met die Star-bakkies, paneelwaens en minibusse behaal het.

Intussen het dinge ‘n bietjie verander en die Chana-naam het uit Suid-Afrika verdwyn. Die verspreiding van die Star-reeks is deur JMC oorgeneem en die vervaardiger se naam het na Changan verander. Die Changan- reeks het aanvanklik bestaan uit die Star III-enkelkajuit, Clubcab (kajuit en ‘n half), dubbelkajuit en Minivan, maar die Clubcab is aan die mark onttrek. Motor Plus het die Star III SC (enkelkajuit) getoets.

 

Die SC is in twee modelle beskikbaar, naamllik die standaardmodel en die Lux, die onderwerp van hierdie verslag. Die Lux kan van sy goedkoper eweknie onderskei word deur middel van ‘n voorstamper en buitespieëls wat in dieselfde kleur as die bakwerk is. Die bakkies het ook almal valkante as standaardtoerusting en die laaibak van die toetsvoertuig was met rubbervoering bedek;
‘n moet vir enige werksvoertuig. Die gewone staalwiele, met 175/70R 14 LT-bande, is heeltemal reg vir hierdie tipe voertuig; allooiwiele en veral wieldoppe sou onnodig wees. Die semi- voorstuurbeheer sal mense dalk flous omdat hulle die enjin onder die kort neus verwag, maar as jy die enjinkap oopmaak, sien jy dat dit net daar is om jou in staat te stel om die olie en water na te gaan. Dit is ook waar die voertuig se remversterker gemonteer is.

Die binnekant is goed afgewerk, maar ‘n mens kon agter dat dit ‘n intr eevlakvoertuig is. Die enigste toegewings wat aan luuksheid gemaak word, en wat die Lux van die standaardmodel onderskei, is lugversorging en elektriese vensters. Daar is geen sentrale sluitstelsel nie, maar omdat dit ‘n kompakte voertuig is, is dit nie regtig ‘n probleem nie. Daar is min plek vir los goedere, en ‘n mens kan vergeet om iets soos ‘n skootrekenaar in die kajuit te vervoer as daar twee insittendes is. As die voertuig nie met ‘n kappie toegerus is nie, is daar geen veilige plek daarvoor nie.

Daar is vier bekerhouers, maar net die twee in die deure is regtig op so ‘n plek gemonteer dat dit bruikbaar is. Die twee voor die rathefboom is laag gemonteer en eerder geskik vir ‘n selfoon of ander klein goedere. Die radio, met twee luidsprekers in die deure, kan as ‘n moderne weergawe van die ou bekende Sanyo Rally-motorradio beskou word; dit is net ‘n radio, sonder ‘n CD-speler of ‘n USB- kragpunt. Daar is wel ‘n AUX-kragpunt vir iets soos ‘n MP3-speler. Die instrumentepaneel bestaan uit ‘n spoedmeter, ‘n toereteller, digitale brandstof- en temperatuurmeters, waarskuliggies en niks anders nie. Die lugversorging werk goed en maak die kajuit gemakliker as wat dit anders sou wees. Daar is twee afsonderlike sitplekke met ‘n handrem tussenin. Daar is net geen plek om enigiets agter die sitplekke te bêre nie, met die gevolg dat die gereedskapstel by die passasier se voete moet lê. Die stuurkolom kan nie verstel word nie en die vierspeekstuurwiel het nie ‘n lugsak nie.

Die oorspronklike Chana Star-reeks was beskikbaar met twee enjingroottes, naamlik ‘n 1 000cc en ‘n 1 300cc, maar ‘n viersilinderenjin met ‘n verplasingsinhoud van 1 243cc is standaardtoerusting vir die nuwe reeks. Dié enjin, wat 72 kW en 119 Nm se wringkrag lewer, is onder die sitplekke gemonteer en diegene wat tydens die toetstydperk in die passasiersitplek was, het opgemerk dat ‘n mens dit kan voel. Omdat dit ‘n werksvoertuig is, kan ‘n mens nie vuurwerke verwag nie, en ‘n ernstige probleem is dat die voertuig se topsnelheid volgens die vervaardigers tot 120 km/h beperk is. Goed, ‘n mens kan redeneer dat dit nie nodig is om vinniger as dit met hierdie tipe voertuig te kan ry nie, maar wat gebeur as jy vining moet versnel? Volgens die vervaardiger is die gemiddelde brandstofverbruik 7,8 liter per 100 km; dit beteken dat ‘n reikasftand van omtrent 480 met die 40 liter-brandstoftenk moontlik is.

Dit is regtig moeilik om mededingers vir die Changan Star te identifiseer. Die Tata Super Ace is op presies dieselfde mark gemik, maar word toegerus met ‘n turbodiesel-enjin van 1,4 liter. Daar is twee modelle met pryse wat wissel tussen R 166 995 en R 177 995. Tata se motor-en vragmotor-afdelings behaal egter nie dieselfde sukses nie; die vragmotors is redelik gewild maar niemand stel meer belang om enige van die motors te koop nie. Daarom wonder ‘n mens hoe lank Tata se motors nog hier beskikbaar sal wees en of enige besluit hieroor ‘n uitwerking op die voortgesette bemarking van die Super Ace sal hê. Motor Plus het twee en ‘n half jaar gelede nog ‘n moontlike mededinger, die Suzuki Super Carry, getoets, maar daar is geen teken van hierdie model op Suzuki se Suid-Afrikaanse webtuiste nie en ‘n mens wonder of hy nog hier beskikbaar is. Die prys van die Star III Lux, soos getoets, is R 151 880, net R 10 000 meer as die standaard model, maar die bykomende kenmerke maak hom die moeite werd.

As jy die Changan Star III gaan beoordeel as enigiets anders as die klein werkesel wat hy is, gaan jy die pot heeltemal mis sit. Jy gaan nie passasiers met hom vervoer nie en jy gaan beslis nie van Pretoria af Kaap toe, of selfs Johannesburg toe, met hom ry nie.. Nee, om om hom na waarde te beoordeel, moet jy hom gebruik vir die doel waarvoor hy ontwerp is, naamlik om te werk. Die plat laaibak met valkante maak hom uiters geskik vir klein sake-ondernemings asook vir boere, veral as hy sy lewe lank in ‘n beperkte omgewing soos op ‘n bouperseel of ‘n plaas gebruik word. Dit is een van die eerlikste voertuie wat ons nog ooit getoets het; hy gee nie voor om te wees wat hy nie is nie en omdat so min klein bakkies op die oomblik beskikbaar is, is daar beslis plek vir hom op die Suid-Afrikaanse mark.

%d bloggers like this: