Suzuki se Jimny vier vyftig jaar

0 Comments

In 1970 het Suzuki ‘n nuwe model bekendgestel wat dadelik die publiek se verbeelding aangegryp het, en waarvan daar sedertdien drie miljoen wêreldwyd vervaardig is.

Die Suzuki Jimny se verhaal het eintlik reeds in 1967 begin. Die destydse Japanese vervaardiger HOPE het in 1967 sy klein 4×4, bekend as die Hopestar  ON 360, bekendgestel, maar om verskeie redes was dit ‘n mislukking. Dié klein voertuig is ontwikkel om aan Japan se vereistes vir Kei-voertuie, wat op daardie stadium enjins van net 360 cm³ kon hê, gemik. ‘n Kei-voertuig is die kleinste moontlike voertuig wat op die Japanese snelweë toegelaat is. Die bougehalte van die Hopestar was egter swak en uiters spartaans.  ‘n Brandstofmeter was byvoorbeeld ‘n deurskynende plastiekpyp. As ‘n mens brandstof deur die pyp kon sien, was alles reg; indien nie, moes ‘n mens vinnig by ‘n vulstasie uitkom.

In ‘n wanhopige poging om die ontwerp te red, het HOPE besluit om die regte op die Hopestar te verkoop. Suzuki het destyds die Hopestar se ontwerp en planne vir die ekwivalent van R 6,5 miljoen gekoop en besluit om die tekortkominge van die oorspronklike ontwerp reg te stel.  Die leerraam-onderstel, soliede aste en bladveerstelsel is verfyn vir beter gehalte en duursaamheid en om massaproduksie te vergemaklik. Die Hopestar se Mitsubishi-enjin van 360 cm³ is deur ‘n tweeslageenheid wat deur Suzuki self ontwikkel is, vervang en die bakwerk is herontwerp.

Die Suzuki LJ (Light Jeep) 10 is in 1970 bekendgestel en was dadelik gewild. Dit was ‘n rateltaai veldryer wat met die Toyota Land Cruiser en Nissan Patrol kon saamgesels, maar baie goedkoper was en minder gekos het om te onderhou. Notgans kon die LJ 10 nie die mas in stedelike toestande opkom nie; sy topsnelheid was 70 km/h en sy noodwiel was waar een van die agtersitplekke moes wees. Dit het gemaak dat daar net drie sitplekke was, sonder enige bagasieruimte.

Die Suzuki LJ50 is in 1976 vrygestel.

Teen 1976 het Suzuki die LJ 50 bekendgestel en besluit dat hierdie model nie meer aan die Kei-vereistes sou voldoen nie. Sy enjinkapasiteit is na 539 cm³ vergroot en die noodwiel is na die agterklap geskuif. Sy topsnelheid was ‘n verstommende 100 km/h, met die wind van agter. Die nuwe model het baie gewild geword en Suzuki se reputasie het al hoe meer gegroei.

Die LJ 80 het in 1977 gevolg. Suzuki het al hoe minder tweeslag-motorfietsenjins vervaardig, en ‘n vierslagenjin van 797 cm³ is vir hierdie model gebruik.  Die brandstoftenk kon  40 liter hou, soos wat vandag nog die geval is.

Suid-Afrika se eerste kennismaking met die klein Suzuki-veldryer was met die SJ 410, wat in 1981 internasionaal bekendgestel is, en twee jaar later een van die eerste Suzuki-motors was wat in Suid-Afrika op die mark gekom het. Die SJ 410 het ‘n enjin van 970 cm³ gehad, maar hoewel hy splinternuut was, is sy leerraamonderstel en bladvere behou. In 1983 het die SJ 413 gevolg; sy enjinkapasitieit van 1 324 cm³ was die grootste wat Suzuki op daardie stadium vervaardig het. Hierdie model was in Suid-Afrika as die Samurai bekend. Teen die einde van sy modellewe was dit al hoe  duideliker dat eienaars hul motors elke dag gebruik en net nou en dan in die veld met hulle gery het. Daarom was daar ‘n klemverskuiwing; die SJ 413 sou steeds sy veldryvermoë behou, maar die kajuit was beter toegerus, met kenmerke soos ‘n radio/kassetspeler, lugversorging en elektriese vensters. Daarby is die bladvere met kronkelvere vervang om die ritgehalte te verbeter.

In 1998 is die nuwe geslag, met ‘n nuwe naam, bekendgestel. Die klein veldryer sou voortaan as die Jimny bekendstaan, en het ‘n paar belangrike nuwe kenmerke gehad, soos nuwe kronkelvering, ‘n skakelaar om tussen 2WD, 4WD-laestrek en 4WD-hoëstrek te kies, en ‘n nuwe 1,3 liter-enjin met sestien kleppe en die keuse van ‘n hand- of outomatiese ratkas.

Die jongste geslag Jimny is aan die begin van 2019 in Suid-Afrika bekendgestel, en soos in 1970’s kan die maatskappy nie voorbly met die vraag nie. Dit is steeds ‘n ware veldryer wat bewys dat groter nie noodwendig beter is nie.